تعالوا اخدكم في مقارنة سريعة بين عربيتين في نفس الفئة تقريبا، الفولكس واجن تيجوان والبيجو 3008 ، للوهلة الاولى العربيتين قد يبانوا منافسين متطابقين وفي نفس الفئة السعرية كمان، العربيتين في نفس الحجم الخارجي تقريبا مع تفوق التيجوان في حجم مساحة التخزين في الشنطة الخلفية بحوالي 616 لتر الى 520 لتر في البيجو وده فرق 100 لتر ومش قليل خالص. المساحات الداخلية في الصالون متقاربة جدا وقياسات العربيتين تقريبا نفس بعض مع فروقات بسيطة في قاعدة العجلات مثلا. بالنسبة لمحركات واداء العربيتين فالتيجوان بتيجي بمحرك فولكس واجن ال 1400 سي سي الشهير وناقل حركة مزدوج القابض (DSG) بـ7 سرعات مع مجموعة كلاتش مبللة (Wet Clutch).المميز والاعتمادي والمنظومة دي بتنتج حوالي 150 حصان. بالنسبة للبيجو 3008 بتيجي بمحرك من عائلة محركات “Prince Engine” التي طُوِّرت بالتعاون بين PSA (بيجو-ستروين) وBMW متصل بناقل حركة اوتوماتيكي من 6 سرعات من المصنع الياباني الشهير آيسن Aisin، والتوليفة دي بتنتج حوالي 180 حصان. مع وجود فروق بين المحركات وفروق القوة في العربيتين لكن العربيتين عندهم تقريبا نفس وقت من 0 الى 100 كم/س وهو حوالي 9 ثواني.
بعيدا عن المحركات، العربيتين بيتمعوا بداخلية ظريفة وخامات جيدة مع تفوق ملحوظ ومتوقع للصانع الالماني في الخامات وراحة المقصورة والعزل وادق التفاصيل الاخرى، التصميم الخارجي للتيجوان اختلف عليه جمهور الفولكس فاجن العريض وبعضهم شايف انها فقدت جزء من هويتها المحافظة ولكن في العموم معظم الناس متقبلة العربية حتى بالتصميم المختلف. اما بالنسبة للتصميم ف بيجو دايما بتبهرنا بالتصاميم الغريبة والمثيرة للجدل. وبصراحة الخامات الخارجية في التيجوان برضه افضل بكتير من الاسد الفرنسي لانه لازال استعمال الفايبر بكثرة في هيكل السيارة مزعج جدا خصوصا في حالات الحوادث (لا قدر الله) لانه بيتطلب تغيير الجزء بالكامل وبتكلفة عالية.
بالنسبة لعوامل الامان فحصلت فولكس فاجن تيجوان في أحدث اختبارات Euro NCAP على تقييم 5 نجوم كاملة بينما حصلت بيجو 3008 في اختبارات Euro NCAP (بروتوكول 2025 الجديد) على تقييم 4 نجوم. بشكل عام، ممكن نقول إن التيجوان بتقدّم مستوى أمان أعلى وأكثر شمولية، وده معروف عن مجموعة فولكس فاجن انها تضع السلامة في مقدمة أولوياتها، بينما تظل الـ3008 سيارة آمنة لكنها لا تصل لنفس مستوى الامان في اختبارات الصدمات وأنظمة المساعدة الحديثة.
بشكل عام العربيتين متقاربين جدا وبيقدموا توليفة اوروبية بسعر متقارب في السوق المصري. بعض المنافسين الاخرين زي الهيونداي توسان والكيا سبورتاج بيقدموا بدائل متقاربة وباسعار ارخص شوية ولكن مش كتير. يمكن اللي بتقدم بديل قريب في المساحات وبعض الخامات، وبنتيجة اختبارات Euro NCAP 5 نجوم كاملة هي ال ام جي اتش اس MG HS ويمكن مقارنتها جدا بهم جميعا وتمتاز عليهم حاليا بفرق سعر حوالي مليون جنيه مصري.
